Мома Серум за лице Sacred drops

Идејата за козметиката тлееше долго време пред да се реализира во проект. Се роди во едно магично место, пред десетина години, меѓу полиците од книгите и инспиративните приказни, во една од најубавите книжарници во градот. Со мојата другарка Ели, (и двете сме Ели :)), гладно ги исчитувавме сите информации за навраќањето кон природата, за совршената креаторка, мајката Земја и за она што широкоградо ни го дава. Во исто време едната од нас се соочуваше со егзема и секој рецепт со нетрпение се испробуваше. Многу работи научивме од традиционалните знаења на нашите простори и од книгите на билкарите и ароматерапевтите. Денес со гордост можеме да се пофалиме дека со она што го применуваме ги надминавме сите кожни состојби, и што е најважно од сѐ, чувството дека кожата повторно дише, е прекрасно.
Ова е тоа што уживаме да го правиме во секое време. Комбинираме и мешаме растителни масла и мириси во теглички и шишенца. Секоја нова комбинација со радост ја тестираме и усовршуваме. Се инспирираме и од искуствата на други што ја делат страста кон природната козметика и додаваме и сознанија до кои ние доаѓаме преку секојдневна употреба. Миксираме сапуни по старите рецепти на бабите (по малку усовршени) и трпелливо чекаме цел месец да созреат. Правиме мали количини, со многу грижа, сѐ со цел да останеме поврзани со неа – Земјата која дава и храни. Многу сме им благодарни на тие што веќе долго време ни даваат поттик и мотивација да излеземе од кожурецот, на најблиските за техничката поддршка и позитивните критики, и на сите кои ја препознаваат вибрацијата и резонираат со неа.